San Valentino in Rana col President

Un poco par scherso e un poco parchè ghin'aveino proprio oia, ale nove erimo partii par nar in notturna in Rana con la oia de nar rento a sta “grottina” che, par quante olte te la fassi, l'è sempre nova e piena de emossion. Beh butei, me so inacorta che la notte la porta consiglio dal bon! Dopo un cafetin tattico al Cacciatore vegnen a saver che el President non è che el fusse proprio proprio despiasentà de esserse portà drio tre done, anzi un colpo el salta fora con :”Oh! L'era ora che vegnesse reinstituio lo Ius Prime Noctis” che, da quel che go capio l'è nà dismesso dala so elession. E alora, finalmente, zio tran, go capio tuto... te credo che me zio Gianni nol ga mia volesto saverghine de sposarse.. Boia can! Se la gh'è na ben el se gà fato tute le done del GSM!

Tra sganasade, un poca de fiachessa e tanta,ma tanta oia, ala fine ghemo pasà el sifon dela Rana. Tuto intorno non gh'era gnan na scìanta de rumore, anca naltri se faseino riguardo a verzer boca, par non desfar quela pace imacolata. Se se scoltava ben se sentea solo el movarse de l'acqua. L'era n' altra Rana, n'altra roba rispeto a quela che gaveino visto mile olte in compagnia, na Rana quasi “balsamica”, tanto che la testa la ghe molava de pensar par fermarse a scoltarla respirare. Par scoltar “el respiro dela grotta”. Na Rana magari anca un pelo pì tecnica, piassè sudà ma ala fine anca piassè conquistà.

Na Rana che lassa spasio a pensieri diversi, a considerassioni importanti, che el President nol ghe gà pensà n'atimo a risparmiarne. Bison dire che el President l'era particolarmente ispirà quela sera, o no Stefy e Francy? Fato stà che ad un certo punto se lo ghen catà a pansa da in su in fessura e, quando che el ne gà sentio rivare, el gà fato un bel respiro e el gà tacà:

“Gavì da saver che na olta ghera du gemei in pansa de so mare. Uno el ghe fa a quel'altro:

A: Pensa fradelo! Tra poco saremo fora da de qua, 
   comissiaremo a respirar aria neta coi nostri polmoni e caminaremo cole nostre gambe..
B: Beh ma..'sto fora? Ci elo stà a contarte 'ste casade?
A: Ma tel digo mi! Pensaremo finalmente co'la nostra testa e podaremo far tuto quel che volaremo.
B: Anbè! A posto sen! Te si mia proprio a piombo ti... 
   Fora de qua gh'è finio tuto! Non ne speta un bel gnente! L'è sta chi la nostra vita... sa vuto piassè?
A: Ma valà! Mi non vedo l'ora de esser fora, 
   al suto e col sole che me scalda par ben... no qua sempre in meso a tuta 'sta acqua!
B: Beh...speta e spera sa vuto che te diga? Mi intanto me godo qua parchè, 
   caro mio, te ciaparè 'na ciavada de quele... te vedarè!

Beh, butele i continua cosita...”. Mi e la Stefy se varden in te i'oci e la Stefy la ciapa el corajo a do man :”Oh President! Ma in do ela la barzeleta?”. “Alà barzeleta! Ma non gavìo mia capio? L'è na METAFORA dela VITA”. Desso, First se rivolgemo a ti, tien de ocio 'sto poro omo, che a diventar papà el comissia a nar de oco!

Quando ghen sentio la Francy osarne se erimo ancora vivi alora ghen capio che forse l'era ora de darse 'na leva e nar fora. Magnà in te na pressia e via al ritorno in te le marmitte nel silensio pì profondo, a parte qualche sana osadina quando l'acqua la rivava a tocar punti critici. Insomma verso le 3 de matina, negai da in sima in fondo, finalmente “uscimmo a riveder le stelle”. Pena fora da l'acqua ne se ga verto sora la testa un cielo da cavar el fià. La luna l'era come un lampion e non servea gnanca impisar le tiche. Le stelle tute intorno le era robe de l'altro mondo!

L'è proprio vera... valarea la pena de vivere solo par poder vedare 'ste maraveje, parchè quel che ne fa restar vivi no iè i momenti in cui respiremo, ma i momenti che i riesse a cavarne el fià. Nel silensio dela notte se sen sentai sula toleta e ghemo brindà ala serata col moro, che nol manca mai, i panineti al miele del President e i grustoli dela Francy, contenti del viajo, dela serata e dela compagnia. E sicome, lo ghemo capio, l'è stà 'na notte riflessiva, tornando casa me gh'è vegnù in mente che non ghe sarea stà maniera migliore de pasar 'sto San Valentino.

Tuti semo e ghemo da esser sempre inamorai de quel che semo, ghemo e femo... E ala fine, ghen pasà la note degli inamorai con quelo che amemo piassè: la compagnia, le sganasade, le stelle, la natura e, bison ammetterlo parchè quelo el ghe stà sempre, 'na bona botiglia de moro! Grassie President, grassie Stefy e Francy dell'avventura e grassie fameja GSM sempre pronta a darme un scorlon de vitalità. Desso go capio sa vol dir “ Noi siamo ciò che amiamo” e digo, par fortuna, non gh'è gnente de piassè vero.

di Lucia Confente